п. Діасёръя

Ас да вок вӧсна

 Лӧнь олӧм, шуда кад. И таысь ыджыд аттьӧ пӧрысь ыджыд бать Василий Арсентьевич Третьяковлы, Великӧй Отечественнӧй войнаса ветеранлы.

Мый ми, ӧнiя челядь, тӧдам вир кисьтана тыш йылысь? Унатор. Вӧлi сьӧкыд, миян салдатъяс мунiсны би пыр и ва пыр. Но ми эг тӧдлӧй сiйӧ олӧмлысь курыд кӧрсӧ. Миян синъяс водзын оз кулавны матыссаяс, мамъяс оз воштыны пиянӧс да нывъясӧс, ог кылӧй бомбитӧм, ог юксьӧй салдатлы сетӧм пайӧн. Миян пӧрысь ыджыд батьяс да пӧльяс вӧлiны геройясӧн. Лымъялiгӧн кӧть зэригӧн, ёна кӧдзыдӧн ассьыныс олӧм жалиттӧг повтӧг тышкасисны вӧрӧгкӧд.

Менам пӧрысь ыджыд бать чужлiс 1926-ӧд вося апрель коймӧд лунӧ Пожӧгдiнын колхозникъяслӧн семьяын. Челядьдырсянь тӧдлiс сьӧкыд удж, зiлис верстьӧкӧд тшӧтш. Отcaлic гортас бергӧдны овмӧс, видзис ичӧтджык вок-чойяссӧ. Уджалiс и колхозлӧн муяс вылын.

Война пансьытӧдз помалiс сизим класс. Жалитiс, мый 1941-ӧд воын шыбитic велӧдчӧм. Буретш сэки школаын кутicны велӧдны немеч кыв, да сiйӧ лыддис, мый салдатлы колӧ тӧдны вӧрӧглысь кыв.

Василий Арсентьевичӧс фронт вылӧ босьтicны 1943-ӧд воын. Сылы вӧлi 17 арӧc. Ёна кӧсйис тышкасьны тшӧтш ыджыдджык Кирилл вок вӧcна, кодi юрсӧ пyктic 1942-ӧд воын Калуга обласьтса Зайцевоын. Сiйӧс ёна радейтлiс, унаторйӧ велӧдчылiс сы вылысь.

Пӧрысь ыджыд бать веськалic Ленинградса медводдза фронт вылӧ. Мездic карсӧ вӧрӧглӧн кытшысь. Ёна доймалic. Госпитальын бурдӧдчӧм бӧрын бара тышӧ. Мездic и Латвияса да Литваса каръяс да сиктъяс. Сэнi сiйӧ доймалic мӧдысь. Куйлic госпитальын. Сэсся веськалic Белоруссияса 2-ӧд фронт вылӧ, мездic Украина, Белоруссия, воис Германияӧдз. Вӧлi Берлинса стен дорын, кор юӧртicны Победа йылысь.

Пӧрысь ыджыд бать тшӧкыда казьтылic сiйӧ кадсӧ. Эз повзьӧдлы, эз висьтавлы вир кисьтана косьяс, тшыгъялӧм, салдатъяслӧн кулӧм йылысь. Казьтывлic ёртъяссӧ, кодъяскӧд артмывлic ылӧдлыны немечьясӧс да кольны ловъяӧн сьӧкыд тышъясын. И 1945-ӧд вося апрель 25-ӧд лунӧ Эльба ю вылын тӧдчана аддзысьлӧм йылысь: «Эльба дорӧ матыстчигӧн ми тӧдiм, мый аддзысям Англияса да Америкаса миянкӧд ӧтсӧгласа войскаяскӧд. Быд лун виччысим налӧн миянланьӧ локтӧм йылысь юӧр. Эгӧ тӧдӧй, мыйӧн ставыс помасяс. Но миянӧс дасьтicны, кыдзи кутчысьны, тшӧктicны, мед ставыс вӧлі лючки-бур кӧм-пасьын. Быттьӧ лӧсьӧдчим парад кежлӧ. Весиг сетicны сутки шойччыны. Кутшӧм кузьӧсь америкаса салдатъясыд!»

Война бӧрын Василий Арсентьевич служитic водзӧ Брестын. Бocьтic водительлысь право да лоис шофёрӧн. Гортас бергӧдчис 1950-ӧд воын. Уна медальӧн пасйисны повтӧм коми зонмӧс. Сiйӧ вӧлi век медводзын, эз дзебсяс ёртъяслӧн мышъяс сайын. Весь эз ов. 1951-ӧд воын велӧдчис электромеханикӧ. Уджавлic техник-механикӧн, токарӧн, слесарӧн, шофёрӧн. Аддзис ассьыс шудсӧ. Ульяния гӧтырыскӧд чужтiсны-быдтiсны ӧкмыс челядьӧс. Сӧмын водз кулic миян пӧрысь ыджыд мам, а пӧрысь ыджыд бать сэсся эз и гӧтрасьлы. Ачыс быдтысис. Ставнысӧ петкӧдiс ас олӧмӧ, ставныс лоисны пыдди пуктана йӧзӧн.

Пӧрысь ыджыд бать важӧн нин абу ловъя. Но ми сiйӧс ог вунӧдӧй. Видзам сылысь медальяс, пыр казьтылам сiйӧс да сылысь висьталӧмсӧ.

Ульяна да Милана УЛЯШЕВАЯС.

Дiасёръя. 

Парма гор, 2019, Май 4 лун (18 №).

 © Усть-Куломская межпоселенческая библиотека